यी सार्वजनिक स्थलदेखि २ सय मिटर टाढा बन्द प्याकेटमा मात्र चुरोट विक्री गर्न पाउने व्यवस्था ऐनले गरेको छ। त्यसैगरी १८ वर्ष मुनिका बालबालिकालाई विक्री वितरण गर्न लगाउन नपाउने व्यवस्था छ।
तर व्यवस्थापकले कारागार, विमानस्थल वा पर्यटकीय स्तरको होटलको कुनै खास ठाउँमा अन्य व्यक्तिलाई प्रतिकुल असर नपर्ने गरी सुर्तीजन्य पदार्थ सेवन गर्ने व्यवस्था भने गर्न पाइने छ।
‘ऐनले तोकेको ठाउँमा चुरोट विक्री गर्न र पिउन पाइने बाहेक अन्य सुर्तीजन्य पदार्थ पुरै निषेध गर्ने गरी तयारी गरेका छौ’ महानगरपालिकाका नगर प्रहरी राजुनाथ पाण्डेले भने।
निषेध कार्यान्वयनको लागि सुर्तीजन्य पदार्थको डिलर तथा उत्पादक कम्पनीलाई १५ दिनको म्याद राखेर जानकारी दिइसकेको नगर प्रहरी प्रमुख पाण्डेले बताए।
सुर्तीजन्य पदार्थ नियन्त्रण तथा नियमन ऐन बनेको १२ वर्ष बितिसक्दा पनि नेपाल सरकारले निषेध गर्न सकेको थिएन। काठमाडौँ महानगरपालिकाले यति धेरै जनघनत्व भएको सहरमा कसरी प्रतिबन्ध लगाउन सम्भव छ त ? यस विषयमा महानगरपालिकाका स्वास्थ्य शाखाका प्रमुख राम प्रसाद पाण्डेले लागू गरेरै छोड्ने प्रतिबद्धता व्यक्त गरे।
‘विक्री गरेको देखेमा प्रहरीले जफत गरिहाल्छ, प्रयोग गरेको देखे जरिवाना लाग्छ’ उनले भने। यो नियम कडाइपूर्वक लागु गर्ने गरी महानगरको तयारी रहेको पाण्डेले जोड दिएर भने। ‘असम्भव भन्ने नै लाग्दैन’ उनले भने।
ऐन लागु गर्नको लागि नगर प्रहरी पसलहरुमा छापा मार्ने र बिक्री वितरण भएको पाइएमा सुर्तीजन्य पदार्थहरु प्रहरीले जफत गर्नेछ।
त्यसैगरी सार्वजनिक स्थलमा प्रयोग गरेको भेटिएमा काठमाडौं महानगरपालिकाको जनस्वास्थ्य ऐन २०५० अनुसार २५ हजारदेखि १ लाखसम्म जरिवाना गरिने व्यवस्था छ।
त्यसैगरी यी स्थलमा सुर्तीजन्य पदार्थको प्रयोग गरी फोहोर गरेमा फोहोरमैला ऐन अन्तर्गत कारबाही गरिने काठमाडौँ महानगरपालिकाका स्वास्थ्य शाखाका प्रमुख राम प्रसाद पौडेलले बताए। nagariknews